రూ.10 నాణేలతో బుల్లెట్ బండి.. 30 ఏళ్ల కలను నెరవేర్చుకున్న చీరాల వ్యాపారి!

బుల్లెట్ బండి అంటే ఎంతోమందికి అదొక కల, ఒక ఎమోషన్. ఆ కలను నిజం చేసుకోవడానికి కొందరు ఏళ్ల తరబడి శ్రమిస్తారు. సరిగ్గా ఇలాగే బాపట్ల జిల్లాకు చెందిన ఓ చేపల వ్యాపారి తన 30 ఏళ్ల కలను ఎంతో పట్టుదలతో వినూత్నంగా నెరవేర్చుకున్నారు. ఏకంగా రూ.3 లక్షల విలువైన రూ.10 నాణేలు ఇచ్చి, సరికొత్త రాయల్ ఎన్‌ఫీల్డ్ బుల్లెట్‌ను సొంతం చేసుకుని అందరి దృష్టిని ఆకర్షించారు.

వివరాల్లోకి వెళితే... బాపట్ల జిల్లా చీరాల మండలం పాత చీరాలకు చెందిన రాసాని రాఘవ చేపల వ్యాపారం చేస్తూ జీవనం సాగిస్తున్నారు. ఆయనకు చిన్నప్పటి నుంచి బుల్లెట్ బండి కొనాలనేది ఓ బలమైన కోరిక. తన 30 ఏళ్ల కలను ఎలాగైనా నిజం చేసుకోవాలని నిశ్చయించుకున్నారు. అయితే, ఆయన తన కలను నెరవేర్చుకునేందుకు ఎంచుకున్న మార్గం అందరినీ ఆశ్చర్యపరిచింది. ఇందుకోసం ఆయన చాలా కాలంగా రూ.10 నాణేలను పోగుచేయడం ప్రారంభించారు. అలా కష్టపడి ఏకంగా రూ.3 లక్షల వరకు జమ చేశారు.

ఆ నాణేలతో బుల్లెట్ బండి కొనడానికి రాఘవ పలు షోరూమ్‌లకు వెళ్లారు. అయితే, బస్తాల్లో తీసుకొచ్చిన రూ.10 నాణేలను చూసి చాలా షోరూమ్‌ల నిర్వాహకులు వాటిని తీసుకునేందుకు నిరాకరించారు. వాటిని లెక్కించడానికి చాలా సమయం పడుతుందని, ఆచరణలో సాధ్యం కాదని చెప్పారు. దీంతో రాఘవ కాస్త నిరాశకు గురయ్యారు. అయినా పట్టు వదలకుండా తన స్నేహితుల సహాయం కోరారు. వారి సహకారంతో ఒంగోలులోని ఓ రాయల్ ఎన్‌ఫీల్డ్ షోరూమ్‌ను సంప్రదించారు.

ఆ షోరూమ్ సిబ్బంది రాఘవ పట్టుదలను, బుల్లెట్ బండిపై ఉన్న ఇష్టాన్ని అర్థం చేసుకుని నాణేలను స్వీకరించేందుకు అంగీకరించారు. సిబ్బంది సహాయంతో ఆ నాణేలన్నింటినీ లెక్కించి, నాలుగు రోజుల క్రితం రాఘవకు సరికొత్త బుల్లెట్ బండిని డెలివరీ ఇచ్చారు. ఈ సందర్భంగా రాఘవ మాట్లాడుతూ.. "నా 30 ఏళ్ల కల నెరవేరింది. చిన్నప్పుడు మా ఊరికి ఎవరైనా బుల్లెట్ మీద వస్తే ఆశ్చర్యంగా చూసేవాడిని. అప్పుడే ఎలాగైనా బుల్లెట్ కొనాలని నిర్ణయించుకున్నా" అని తన సంతోషాన్ని పంచుకున్నారు. అనంతరం తన భార్య శ్రీలక్ష్మితో కలిసి కొత్త బైక్‌పై రైడ్‌కు వెళ్లి మురిసిపోయారు. పట్టుదల ఉంటే ఎంత పెద్ద కలను అయినా సాధించవచ్చని రాఘవ నిరూపించారు.